Կոչ ենք անում ինքնակազմակերպվել և ամեն կերպով բոյկոտել ռուսերենը որպես պաշտոնական լեզու կիրառելու բոլոր միջոցառումները

ՀԱՅՏԱՐԱՐՈՒԹՅՈՒՆ

Արցախում բոյկոտել ռուսաց լեզուն

Հայաստանի Հանրապետության մաս կազմող Արցախը զավթելուց և կիսելուց հետո սկսվել է հայկական ժառանգության և ինքնության յուրացումն ու ոչնչացումը։Թուրք-ադրբեջանական զավթման գոտում, որի հայ բնակչությունը սպանվել, գերեվարվել կամ փախուստի է մատնվել, զանգվածաբար քանդվում կամ յուրացվում են հայկական ժառանգության նմուշները։

Ռուսական զավթման գոտում, որտեղ կա հայ բնակչություն, տեղի դավաճան քաղաքական վերնախավի միջոցով մեկնարկել է հայ ինքնության հիմքի ու առանցքի՝ հայոց լեզվի, ստորադասման ու դուրսմղման գործընթաց։

Որպես առաջին քայլ, Արցախի այսպես կոչված Ազգային ժողովը երեկ՝ մարտի 25-ին, օրենք է ընդունել ռուսերենը պաշտոնական լեզու դարձնելու վերաբերյալ։

Հաշվի առնելով, որ Արցախը ժամանակավորապես զավթված է և նրա տարածքի վրա փաստացի չի գործում  Հայաստանի Հանրապետության իրավազորությունը, արցախցի մեր հայրենակիցներին կոչ ենք անում ինքնակազմակերպվել և ամեն կերպով բոյկոտել ռուսերենը որպես պաշտոնական լեզու կիրառելու բոլոր միջոցառումները։

Արցախցի մեր հայրենակիցները խորապես ըմբռնում են, որ այսօր Արցախի հողի վրա ապրելը և հայոց լեզուն ու հայ ինքնությունը պահպանելը ճակատագրական նշանակություն ունեն ազգի և նրա պետականության համար, ուստի ամեն գնով կատարում են իրենց այդ առաքելությունը։ Համոզված ենք, որ այս մղձավանջը երկար չի տևելու, զավթիչները մաքրվելու են Արցախից, իսկ ազգային դավաճանները պատասխան են տալու օրենքի և պատմության առաջ։

Ազգային-ժողովրդավարական բևեռի խորհուրդ
26 մարտի 2021 թ., Երևան

Բաժիններ